تری ادائے دل آویزئیِ فغاں کو سلام
اے کربلا کے مؤذن تری اذاں کو سلام
چلا یوں طیبہ سے کربل کو کاروان حسین
پرندے کر کے چلیں جیسے آشیاں کو سلام
نبی کے اجڑے ہوئے گلستاں قیامت تک
بہار کرتی رہے گی تری خزاں کو سلام
تری بلندئیِ درجات دیکھ دیکھ حسین
فلک ہے کرتا ترے سنگ آستاں کو سلام
ستارے اپنی زباں میں چمک کے کرتے ہیں
زمین کرب و بلا رشک کہکشاں کو سلام
جو چومتی تھی کف سبط صاحب قوسین
کریں نہ تیر بھلا کیسے اس کماں کو سلام
سلام حضرت عباس کی اخوت کو
حبیب ابن مظاہر سے ہم عناں کو سلام
کرے جو مدحت شہدائے کربلا ہردم
ادب سے بھیجئے ” مصباح ” اس زباں کو سلام
