گلشن کی آرزو ہے نہ رعنائیاں پسند
ہم کو درِ مدار کی ہیں جالیاں پسند
اہلِ جہاں کو خلد کی ہیں وادیاں پسند
مجھ کو تمہارے در کی یہ انگنائیاں پسند
کشکول نسبتوں کا تیری ہے ہمیں عزیز
زر سے بھری ہوئی نہیں الماریاں پسند
ہم کو پیاری تیری غلامی کی بندشیں
ہم لوگ واقعی نہیں آزادیاں پسند
کشتیئِ پنج تن سے نہ ہو جن کی نسبتیں
ہم ڈوبتوں کو ایسی نہیں کشتیاں پسند
جن محفلوں میں تذکرہ سرکار کا نہ ہو
ان محفلوں سے ہم کو ہیں تنہائیاں پسند
بس تیرے در کے ٹکڑوں پہ پلتا رہوں سدا
مجھ کو گھمنڈیوں کی نہیں جھڑکیاں پسند
آئے وہ دیکھیں موسمِ عرسِ مدار پاک
جن کو حسیں رتوں کی ہیں برنائیاں پسند
مجھ کو مدار تیری اشاعت کی راہ میں
رسوائیاں ملیں تو وہ رسوائیاں پسند
سرکار تم کو چھوڑ کے کیا کرنی شہرتیں
مجھ کو تمہارے عشق میں گمنامیاں پسند
دردر نہیں بھٹکتے تیرے در کو چھوڑ کر
تیرے غلام جتنے ہیں خودداریاں پسند
بربادیاں ہماری اگر چاہتے ہیں آپ
سرکار ہم کو اپنی یہ بربادیاں پسند
سرکار تم کو چھوڑ کے جو روٹیاں ملیں
مصباح کو کبھی نہیں وہ روٹیاں پسند ہیں
