اے سرور کونین شہنشاہِ دوعالم
سر تا بہ قدم پیکر انوار مجسم
مسجود ملائک ہے ترا نور مکرم
کہتی ہے چمکتی ہوئی پیشانئ آدم
مدح شہ لولاک بیاں کیسے کریں ہم
ذکر ان کا سوا فرصت ہستی ہے بہت کم
اللہ رے شیرینئ گفتار کا عالم
نفرت کے شراروں کے لئے پیار کی شبنم
جب ثور میں زانو پہ سرختم رسل تھا
اس وقت کوئی دیکھتا صدیق کا عالم
سرکار دو عالم کی دعاؤں کا ثمر تھا
کہتا ہے زمان جنہیں فاروق معظم
اک درس ہے اس ذات کی بکھری ہوئی سیرت
قرآن کی آیات ہیں کی جس نے منظم
مرہون کرم آج بھی ہے دین انہیں کا
وہ جن کا دوپٹہ بنا اسلام کا پرچم
سب پر ہیں اسی مہر رسالت کی شعائیں
وہ بوذر و سلمان ہوں یا زید بن ارقم
خون اسد اللہی کی گردش ہے رگوں میں
کر سکتے ادیب ” اب بھی ہیں خیبر شکنی ہم
