حضرت یوسف ہیں حیراں حسن صورت دیکھ کر
محو ہیں قدسی میرے آقا کی سیرت دیکھ کر
طاعت خیر الوریٰ سے زندگی تعبیر ہے
ہم تو یہ سمجھے ہیں قرآں کی عبارت دیکھ کر
کفر کی تاریکیوں پر جیسے بجلی گر پڑی
ہر طرف پھیلا ہوا نور رسالت دیکھ کر
دیدیا امی لقب نے علم و دانش کو فروغ
دہر میں تاریکئ دور جہالت دیکھ کر
جب تباہی کے دہانے پر کھڑی تھی زندگی
خالق کل نے انھیں بھیجا ضرورت دیکھ کر
خون کے پیاسوں کو جب سرکار نے بخشی ردا
سرکشوں کے سرجھکے یہ شانِ رحمت دیکھ کر
منزل قوسین تک پہنچے ہیں پائے مصطفیٰ
ہیں ملک حیراں عروج آدمیت دیکھ کر
اُٹھ گئی آخر نگاه رحمة للعالمیں
رحمتیں برسیں میرے اشک ندامت دیکھ کر
قبر میں ہر سمت جنت کے دریچے کھل گئے
جب کہا صل علیٰ ان کی شباہت دیکھ کر
خون میں شامل ہے اُن کے خون کا ذرہ ادیب”
رشک کرتا ہے زمانہ میری نسبت دیکھ کر
