خون میں ڈوبے ہوئے رنگیں نظاروں کو سلام
آسمان کربلا کے چاند تاروں کو سلام
جن کا مرہون کرم ہے باغ دین مصطفیٰ
گلستان فاطمہ کی ان بہاروں کو سلام
کرتے پروانے ہیں شاید ہو کے شمع پر فدا
اہلبیت مصطفیٰ کے جاں نثاروں کو سلام
دشت دشمن میں بھی رہکر کرتے ہیں تیغ و سناں
ذو الفقار حیدری کے ورثہ داروں کو سلام
ہنس کے جو شبیر کے قدموں پہ قرباں ہو گئے
زینب دلگیر تیرے ان دلاروں کو سلام
بخش دیتا ہے خدا ان کو جہاں کے اختیار
کرتے ہیں جو کربلا کے بے سہاروں کو سلام
کرگئیں جو چہرۂ سبط نبی کو سرخ رو
خون اصغر تیری ان معصوم دھاروں کو سلام
کرتا تھا “مصباح ” بڑھ کر ہر قدم پر حوصلہ
ریگزار کربلا کے شہسواروں کو سلام
