راحت قلب و جاں السلام السلام
اے مدار جہاں السلام السلام
ہو رہے ہیں فدا روضۂ پاک پر
یہ مہ و کہکشاں السلام السلام
معترف آپ کی عظمتوں کے ہوئے
اولیاء زماں السلام السلام
کہتے ہیں تشنگان مئے معرفت
قلزم بیکراں السلام السلام
آپ سے پاکے اسلام کہنے لگیں
بند کی بستیاں السلام السلام
آپ کے در پہ آکر جھکے تاجور
شاہ شاہنشہاں السلام السلام
آپ ہیں میرے افسانۂ زیست کے
سرخئی داستاں السلام السلام
محفلوں محفلوں سے ادیب آج بھی
آپ کا مدح خواں السلام السلام