میں نعت کہوں کب مجھے تمئیز سخن ہے
بس عشق نبی ہی مرا سر مایۂ فن ہے
پھولوں کی یہ دھرتی نہ ستاروں کا گگن ہے
طیبہ ہی فقط میری تمنا کا چمن ہے
کیا بات تری اے گل گلزارِ مدینہ
ہر غنچہ ترا نافۂ آہوئے چمن ہے
مفلس پس مردن بھی نہیں ان کے فدائی
مہتاب اڑھاتا انھیں چاندی کا کفن ہے
سورج تو نظر مجھ سے ملا ہی نہیں سکتا
آنکھوں میں مری مہر رسالت کی کرن ہے
اے صلی علیٰ ذکر طبیب ازلی کا
دل شعلہ بداماں ہے نہ سینے میں جلن ہے
رکھ دل میں حفاظت سے یہ داغ غم احمد
بازار وفا میں اسی سکے کا چلن ہے
حیران ہوں کیا تحفہ کروں پیش میں آقا
جاں دینا تو عشاق کی اک رسم کہن ہے
بیکار تو ہوتا ہے ادیب ” اتنا ہراساں
سرکار ہیں واقف جو ترے دلکی لگن ہے
