کام تعلیم رسول عربی آہی گئی
اپنی منزل پر حیات بشری آہی گئی
سیرت سرور کونین نے وہ درس دیا
کم سوادوں میں وسیع النظری آہی گئی
جب کبھی آتش فرقت نے جلایا دل کو
سمت طیبہ سے نسیم سحری آہی گئی
@madaarimedia
لے چلی ہے مجھے صحرائے مدینہ کی طرف
کام آخر مری آشفتہ سری آہی گئی
عشق طیبہ میں ملا جس کو بھی رنج دوری
اس کی آہوں میں قیامت اثری آہی گئی
قاب قوسین کے مفہوم سے یہ ظاہر ہے
پرده داری میں بھی کچھ پردہ دری آہی گئی
دل کو مایوسی نے ہر سمت سے گھیرا جو ادیب “
ایسے عالم میں مجھے یاد نبی آہی گئی
