نفرتیں دل سے مٹاؤ آگیا ماہ صیام

نفرتیں دل سے مٹاؤ آگیا ماہ صیام
الفتیں دل میں بساؤ آگیا ماہ صیام

سن لیں آقا کے دیوانے آگیا ماہ صیام
خلد کا رستہ دکھانے آگیا ماہ صیام

رنج و غم دل سے مٹانے آگیا ماہ صیام
عاصیوں کو بخشوانے آگیا ماہ صیام

سحری و افطار کے منظر انوکھے دیکھئے
نعمتیں رب کی کھلانے آ گیا ماہ صیام

ہے ہر اک لمحہ عبادت اس مبارک ماہ میں
کھل گئے رب کے خزانے آگیا ماہ صیام

مومنوں کرتے رہو رب کی عبادت شوق سے
برکت و رحمت لٹانے آگیا ماہ صیام

اے مجاہد اس مبارک ماہ کے روزے تو رکھ
مژدء جنت سنانے آ گیا ماہ صیام

مجاہد مداری

Nafratein dil se mitaao, aa gaya Maah-e-Siyaam