حسن تخیلات کی محفل سجائیے
تنہائیوں میں نعت نبی گنگنائیے
پلکوں پہ اشک ہجر نبی جگمگائیے
ہر شام زندگی کو سویرا بنائیے
ممکن نہیں جو گنبد خضری میں حاضری
خوابوں میں ہی کبھی مجھے جلوہ دکھائیے
آنکھیں دکھا رہا ہے قیامت کا آفتاب
دامن میں ہم کو شافع محشر چھپائیے
رہنے بھی دیجیے یہ زمانے کے تذکرے
مجھ کو مرے رسول کی باتیں سنائیے
دل پر گراں ہیں ارض مدینہ سے دوریاں
میرے حضور اب مجھے طیبہ بلائیے
امت کا تھا خیال جسے وقت نزع بھی
اس پر درود پاک کے موتی لٹائیے
کچھ ایسے ڈوب جائیے عشق رسول میں
مصباح ” اپنے آپ کو بھی بھول جائیے
