mahzarmakanpuri Archives - Page 5 of 6

علاج ہر بلائے غم ہیں کملی اوڑھنے والے

05/03/202509/12/2024 by @Admin

علاج ہر بلائے غم ہیں کملی اوڑھنے والے

مرے مونس مرے مرے ہمدم ہیں کملی اوڑھنے والے

کرم کی اک نظر کر دیجئے صدقہ نواسوں کا

ستم دنیا کے اب پیہم ہیں کملی اوڑھنے والے

ہوئے ہیں منعکس حسن وقبا کے زاوئے جس میں

وہی آئینہ عالم ہیں کملی اوڑھنے والے

ز آدم تا بعیسی ہر نبی نے یہ شہادت دی

خدا کے بعد بس اعظم ہیں کملی اوڑھنے والے

اسی در پر بلا لیجے خدا را اب تو محضر کو

جہاں سب کی جبینیں خم ہیں کملی اوڑھنے والے

——

ہر اک نبی نے ان کا کیا احترام ہے

05/03/202509/12/2024 by @Admin

ہر اک نبی نے ان کا کیا احترام ہے

کتنا بلند میرے نبی کا مقام ہے

منکر نکیر کر نہ سکے پھر کوئی سوال

پایا جو میرے لب پہ محمد کا نام ہے

ابھرے جو آفتاب تو حیرت کی بات کیا

ہاتھوں میں ان کے دونوں جہاں کا نظام ہے

میں پڑھ رہا ہوں نعت نبی اور بزم میں

جاری ہر ایک لب پہ درود و سلام ہے

انوار صبح ہوتے ہیں سو جان سے فدا

کتنی حسین ارضِ مدینہ کی شام ہے

اے گردش زمانہ نہ محضر سے تو الجھ

معلوم ہے تجھے یہ نبی کا غلام ہے

——

نہیں دنیا میں ہے کوئی ہمارا یا رسول اللہ

05/03/202509/12/2024 by @Admin

نہیں دنیا میں ہے کوئی ہمارا یا رسول اللہ

سہارا یا رسول اللہ سہارا یا رسول الله

ہے گردش میں مقدر کا ستارا یا رسول اللہ

بس اک نظر کرم ہم پر خدا را یا رسول الله

دیا ہے آپ نے اس کو سہارا یا رسول اللہ

کسی نے آپ کو جس دم پکارا یا رسول اللہ

مدینے کی طرف جاتا ہوا جب کوئی ملتا ہے

تڑپتا ہے دل بے کس ہمارا یا رسول الله

ہوئی سایہ فگن ہے اس کے سر پر رحمت باری

قیامت میں تمہیں جس نے پکارا یا رسول اللہ

میسر ہو کبھی سر کار یہ دل کی تمنا ہے

نظر کو آپ کے در کا نظارہ یا رسول اللہ

ہے محضر ہند میں اور آپ ہیں گلزار طیبہ میں

کہاں تک دل کرے اس کو گوارا یا رسول اللہ

——

روح کونین ہے قربان مدینے والے

05/03/202509/12/2024 by @Admin

روح کونین ہے قربان مدینے والے

مرحبا کتنے ہیں ذیشان مدینے والے

رفعت اوج ہر امکان مدینے والے

حاصل صنعت رحمان مدینے والے

میں بھی پہنچوں کبھی طیبہ میں بھکاری بن کر

میرے دل میں ہے یہ ارمان مدینے والے

کس تحمل سے سر عرش بریں پہنچے ہیں

بن کے اللہ کے مہمان مدینے والے

میری جانب بھی کبھی اٹھے عنایت کی نظر

میری مشکل بھی ہو آسان مدینے والے

سیل طوفان حوادث کا ہمیں کیا خطرہ

جب ہمارے ہیں نگہبان مدینے والے

مدحت پاک میں دے اپنی زباں کو جنبش

آدمی کا نہیں امکان مدینے والے

رحمتیں آپ نے برسائیں گنہگاروں پر

آپ کا کتنا ہے احسان مدینے والے

مطمئن دل ہے مرا روزِ جزا سے محضر

میری بخشش کے ہیں سامان مدینے والے

——

کتنا کرم ہے دیکھیے مجھ پر حضور کا

05/03/202509/12/2024 by @Admin

کتنا کرم ہے دیکھیے مجھ پر حضور کا

مشہور میں غلام ہوں گھر گھر حضور کا

محفوظ وہ رہے گا قیامت کی دھوپ سے

دامن رہے گا جس کے بھی سر پر حضور کا

اس بات کا کلام الہی گواہ ہے

ہوگا نہ ہو سکا کوئی ہمسر حضور کا

چشم تصورات کے قربان جائیے

روضہ ہے میرے سینے کے اندر حضور کا

آقا اگر بلائیں تو ہو حاضری نصیب

ہر چند یہ غلام ہے بے زر حضور کا

دو نیم ماہتاب اشارے میں افتاب

اور کرتے ورد کلمہ ہیں پتھر حضور کا

جب جا کے لامکاں سے آئے مکان میں

ہلتی تھی کنڈی گرم تھا بستر حضور کا

چومیں قدم نہ کیسے دو عالم کی رفعتیں

ادنی سا اک غلام ہے محضر حضور کا

——

مے نوش ہوں ہے کتنے قرینے کی آرزو

05/03/202509/12/2024 by @Admin

مے نوش ہوں ہے کتنے قرینے کی آرزو

میخانۂ نبی سے ہے پینے کی آرزو

اس عاشق رسول کی نسلیں مہک اٹھیں

تھی جس کے دل میں ان کے پسینے کی آرزو

جب سے رسول پاک نے ہیں رکھ دئیے قدم

جنت بھی کر رہی ہے مدینے کی آرزو

کافی ہے مرے دل کے لئے عشق مصطفیٰ

کیا پوچھتے ہو کیسے ہے جینے کی آرزو

آنکھوں کے سامنے ہے سمندر گناہ کا

رکھتا ہوں پنجتن کے سفینے کی آرزو

اک سمت میرا ذہن ہے اک سمت میرا دل

مکے کی ہے تلاش مدینے کی آرزو

یوں دل کو عشق سرور عالم کی ہے طلب

جیسے کرے انگوٹھی نگینے کی آرزو

شاید کیا ہے یاد دیار رسول نے

بے چین کر رہی ہے مدینے کی آرزو

بو جہل چاہتا تھا نہ ہو دین کا فروغ

پوری نہ ہوسکی یہ کمینے کی آرزو

قطب المدار طیبہ سے جولے کے آئے ہیں

محضر ہے مجھ کو ایسے دفینے کی آرزو

——

صبا نے آکر دیا یہ مژدہ حضور طیبہ بلا رہے ہیں

05/03/202509/12/2024 by @Admin

صبا نے آکر دیا یہ مژدہ حضور طیبہ بلا رہے ہیں

سلام رخصت تجھے تمنا حضور طیبہ بلا رہے ہیں

نہ آ مرے پاس فکر دنیا حضور طیبہ بلا رہے ہیں

نہ روکے کوئی بھی میرا رستہ حضور طیبہ بلا رہے ہیں

جبیں کو اپنی قدم بنانا نظر نظر کو ادب سکھانا

کہ دیکھنا ہے جمال خضری حضور طیبہ بلا رہے ہیں

بڑھایا آقا نے تیرا رتبہ قبول ہوگا ہر ایک سجدہ

چمک اٹھا ہے ترا ستارہ حضور طیبہ بلا رہے ہیں

نگاہ سردار انبیاء میں بس اک یہی قیمتی ہے تحفہ

سنبھال کر رکھ دل شکستہ حضور طیبہ بلا رہے ہیں

عجیب تر عشق کا چلن ہے کہ چال میں والہانہ پن ہے

بلال نے خواب میں جو دیکھا حضور طیبہ بلا رہے ہیں

میں عاصی اور رحمتوں کا زینہ کہاں یہ محضر کہاں مدینہ

دعا ہے ماں کی کرم خدا کا حضور طیبہ بلا رہے ہیں

——

کب تک یہ کہہ کر ہم آقا اپنا دل بہہ لائیں گے

05/03/202509/12/2024 by @Admin

کب تک یہ کہہ کر ہم آقا اپنا دل بہہ لائیں گے

اب کے امیدیں راس آئیں گی اب کی مدینے جائیں گے

عظمت آقا کے سب منکر آگ میں ڈالے جائیں گے

جو ہیں وفاداران رسالت وہ کوثر چھلکا ئیں گے

کیسی تپش اور کیسی گرمی منہ کو چھپائے گا سورج بھی

سر پہ گنہگاروں کے وہ گیسو حشر میں جب لہرائیں گے

لگ جائے گا پار سفینہ ڈوبنے والے وہ ہے مدینہ

جب ان کی تو دے گا دہائی طوفاں خود کترائیں گے

کیسی دوری کیا مہجوری دیں گے جب آقا اذن حضوری

پہنچیں گے ہم اڑ کے مدینہ ایسے بھی دن آئیں گے

آنکھ میں جو غم کے بادل ہیں ان کو کم قیمت نہ کہو

یہ بادل ہیں ہجر نبی کے یہ موتی برسائیں گے

محضر ان کا ہر متوالا کرتا ہے مرنے کی تمنا

جب سے سنا ہے کنج لحد میں وہ جلوہ دکھلائیں گے

——

جو بھی مرے حضور کے در کے قریب ہیں

05/03/202509/12/2024 by @Admin

جو بھی مرے حضور کے در کے قریب ہیں

یہ سوچئے وہ کتنے بڑے خوش نصیب ہیں

آنکھوں سے اپنی موتی لٹاتے ہیں عشق کے

کہنے کو ان کے چاہنے والے غریب ہیں

خنجر گلے پہ پھر بھی ہے سجدے کی آرزو

آقائے کائنات کے پیارے عجیب ہیں

کوئی مسیح ، کوئی کلیم اور کوئی خلیل

لیکن مرے حضور خدا کے حبیب ہیں

میں تم میں چھوڑ جاتا ہوں قرآں و اپنی آل

وہ کہتے ہیں جو دین کے پہلے خطیب ہیں

لائیں وہ کیا نگاہ میں جنت کی راحتیں

طیبہ کی نعمتیں جنہیں محضر نصیب ہیں

——

بھروسہ پل کا نہیں یہ گھڑی ملے نہ ملے

05/03/202509/12/2024 by @Admin

بھروسہ پل کا نہیں یہ گھڑی ملے نہ ملے

چلو مدینے یہ موقع کبھی ملے نہ ملے

تو جذب شوق کو اپنا بنا رفیق سفر

سفر طویل ہے ساتھی کوئی ملے نہ ملے

سر نیاز ہر اک گام پر لٹا سجدے

تجھے مدینے کی پھر یہ گلی ملے نہ ملے

در نبی پہ حضوری کے واسطے مجھ کو

جنون عشق ہے کافی کوئی ملے نہ ملے

حضور جس میں ہوں بالیں پر جلوہ گر مالک

ملے وہ موت مجھے زندگی ملے نہ ملے

اسے تو صحن حرم میں سلام کرتا چل

دیار ہوش میں دیوانگی ملے نہ ملے

نہال کیوں نہ ہو دید جمال خضری سے

کہ دل کو پھر کبھی ایسی خوشی ملے نہ ملے

سنا دے جھوم کے اشعار نعت اے محضر

کہ پھر فضائے دیار نبی ملے نہ ملے

——

Home

Bookmark

Menu

Videos

Join

علاج ہر بلائے غم ہیں کملی اوڑھنے والے

ہر اک نبی نے ان کا کیا احترام ہے

نہیں دنیا میں ہے کوئی ہمارا یا رسول اللہ

روح کونین ہے قربان مدینے والے

کتنا کرم ہے دیکھیے مجھ پر حضور کا

مے نوش ہوں ہے کتنے قرینے کی آرزو

صبا نے آکر دیا یہ مژدہ حضور طیبہ بلا رہے ہیں

کب تک یہ کہہ کر ہم آقا اپنا دل بہہ لائیں گے

جو بھی مرے حضور کے در کے قریب ہیں

بھروسہ پل کا نہیں یہ گھڑی ملے نہ ملے

Links

Quick Links

Top Categories