رحمت الہی سے آقا وہ ہمارے ہیں

رحمت الہی سے آقا وہ ہمارے ہیں
لاڈلے جو حیدر کے مصطفی کے پیارے ہیں

کشتئ ولایت کے تم ہو ناخدا مولا
لاکھوں بحر عرفاں میں تم نے پار اتارے ہیں

منزل محبت کے تم ہو رہبر کامل
کارواں محبت کے ساتھ ہی تمہارے ہیں

اس طرف بھی ایک ساغر مصطفی کی الفت کا
ہم بھی پیاس کے مارے آپ کے سہارے ہیں

زندگی میں جنت کا لطف اس کو آیا ہے
ارض قطب عالم میں جس نے دن گزارے ہیں

آج بھی ہے موج افگن علم مصطفی جن میں
تیرے لب سے وہ پھوٹے مصطفی کے دھارے ہیں

وہ مدار عالم کا آستاں ہے اے نیر
جس جگہ مدینے کے ہر طرف نظارے ہیں

از قلم:- زبدۃ الاصفیاء ، عمدۃ الاتقیاء ، حامل روحانیت ، پیکر نورانیت ، قبلہء عقیدت ، کعبہء محبت ، شیخ المشائخ
حضور سیدی ، سندی الحاج سید ظہیر المنعم ببن میاں صاحب قبلہ جعفری مداری رضی اللہ عنہ