سلامِ عقیدت بر حضورِ خیر الانام
از قلم: شہزادۂِ ابو العلماءمفتی سید مشرف عقیل امجدی
نورِ ربُ العلا تم پہ لاکھوں سلام
اے میرے مصطفی تم پہ لاکھوں سلام
تیرے دم سے جہاں میں اُجالا ہوا
تیری آمد سے سب کو سہارا ملا
بحرِ جود و سخا تم پہ لاکھوں سلام
اے میرے مصطفیٰ تم پہ لاکھوں سلام
ماند دِکھنے لگی چاند کی چاندنی
بے سہاروں کو حاصل ہوئی ہر خوشی
اے حبیبِ خدا تم پہ لاکھوں سلام
اے میرے مصطفیٰ تم پہ لاکھوں سلام
منبعِ روحِ جاں فخرِ کون و مکاں
تیری عظمت پہ قرباں زمین و زماں
شاہِ ہر دوسرا تم پہ لاکھوں سلام
اے میرے مصطفیٰ تم پہ لاکھوں سلام
جب سے رکھا قدم آپ نے مصطفیٰ
جو تھا یثرب وہ شہر مدینہ بنا
سید الانبیاء تم پہ لاکھوں سلام
اے میرے مصطفیٰ تم پہ لاکھوں سلام
یہ مشرف بھی دیکھیے دیار نبی
آرزو ہے دلِ مضطرب کی یہی
سن لو میری صدا تم پہ لاکھوں سلام
اے میرے مصطفیٰ تم پہ لاکھوں سلام
