سلامِ عقیدت بر آستانِ قطبُ المدار
از قلم: شہزادۂِ ابو العلماءمفتی سید مشرف عقیل امجدی
سیدِ عارفاں تم پہ لاکھوں سلام
اے مدارِ جہاں تم پہ لاکھوں سلام
آپ کے دم سے قائم نظامِ ہُدیٰ
آپ کی ذات رحمت کا ہے سلسلہ
شمعِ صادق نشاں تم پہ لاکھوں سلام
اے مدارِ جہاں تم پہ لاکھوں سلام
آپ کے فیض سے دل منور تمام
آپ کے ذکر سے ہیں معطر کلام
روحِ ایمان و جاں تم پہ لاکھوں سلام
اے مدارِ جہاں تم پہ لاکھوں سلام
تُو امامِ صفا، تو امین وفا
تیرے قدموں پہ قربان اہلِ صفا
مُونِسِ بے کساں تم پہ لاکھوں سلام
اے مدارِ جہاں تم پہ لاکھوں سلام
تو ولایت کا دریا، کرم کی گھٹا
تیرا دامن پناہِ دلِ مبتلا
نورِ ارض و سماں تم پہ لاکھوں سلام
اے مدارِ جہاں تم پہ لاکھوں سلام
آلِ محبوبِ ربّ العلا آپ ہیں
میرے ہر دردِ غم کی دوا آپ ہیں
فخرِہندوستاں تم پہ لاکھوں سلام
اے مدارِ جہاں تم پہ لاکھوں سلام
ہے مشرف بھی ادنیٰ غلام آپ کا
اس لیے لب پہ اس کے ہے نام آپ کا
اے ولایت کی کاں تم پہ لاکھوں سلام
اے مدارِ جہاں تم پہ لاکھوں سلام
