Allama_Adeeb_Naat Archives - Page 3 of 19

مقصد جز و کل مرضئ کبریا آپ کی ذات ہے یا حبیب خدا

05/03/202507/12/2024 by @Admin

مقصد جز و کل مرضئ کبریا آپ کی ذات ہے یا حبیب خدا

ختم جس پر نبوت کا ہے سلسلہ آپ کی ذات ہے یا حبیب خدا

موم جس نے کیا سختی و سنگ کو دور جس نے کیا کفر کے زنگ کو

جس نے آئینۂ دل پہ کی ہے جلا آپ کی ذات ہے یا حبیب خدا

امن عالم کا ہیں آپ ہی تو سبب آپ نے کی ہے تکمیل منشائے رب

کہہ اٹھا خود خدا جس پہ صل علیٰ آپ کی ذات ہے یا حبیب خدا

وہ ضعیفہ جو دیتی تھی کانٹے بچھا آپ اس کی عیادت کریں مرحبا

جس نے کی حسن اخلاق کی انتہا آپ کی ذات ہے یا حبیب خدا

یاد ہے ارض طائف کا وہ واقعہ پتھروں سے تھے زخمی ہوئے دست و پا

نکلی ایسے میں جس کے لبوں سے دعا آپ کی ذات ہے یا حبیب خدا

کہکے دونوں کو باہم لباس وفا دیکے انسان کو حکم مہر و عطا

جس نے عورت کو جینے کا حق دے دیا آپ کی ذات ہے یا حبیب خدا

بھینی بھینی محبت کی خوشبو لئے ہم غریبوں کی آنکھوں میں آنسو لئے

چومتی ہے قدم جس کے باد صبا آپ کی ذات ہے یا حبیب خدا

جس سے علم علی او ں اور حیائے غنی عظمت عدل جس سے عمر کو ملی

جس پہ قربان صدیق سا با وفا آپ کی ذات ہے یا حبیب خدا

کیوں نہ صدقے ادیب ” اس پہ ہوں جان و تن خود سیئے ہاتھ سے جو پھٹا پیرہن

تا جدار عرب مالک دوسرا آپ کی ذات ہے یا حبیب خدا

_______________

فخر نوح و فخر آدم سرور کونین ہیں

05/03/202507/12/2024 by @Admin

فخر نوح و فخر آدم سرور کونین ہیں

وجہ تخلیق دو عالم سرور کونین ہیں

حضرت آدم سے عیسیٰ تک جو آئے انبیاء

سب مؤخر ہیں مقدم سرور کونین ہیں

خشت عصیاں پر جو بر سے بن کے رحمت کی گھٹا

وہ ترے گیسوئے برہم سرور کونین ہیں

پوچھئے تو یہ بتائیں گے جناب جبرئیل

دونوں عالم میں معظم سرور کونین ہیں

آسمانوں کے فرشتے ہوں کہ ہوں جن و بشر

سب کے سردر پہ ترے خم سرور کونین ہیں

گنبد خضری پہ اشکوں کے گہر قرباں کریں

چاہتے یہ دیدۂ نم سرور کونین ہیں

جسم کا سایہ نہ ہونے سے یہ ثابت ہو گیا

پیکر نورِ مجسم سرور کونین ہیں

کیوں نہ ہوں حاصل ہمیں دونوں جہاں کی نعمتیں

جب غلاموں میں ترے ہم سرور کونین ہیں

آپ جو چاہیں تو مل جائے ہر اک دکھ سے نجات

ایک دل اور سیکڑوں غم سرور کونین ہیں

پائے گا آرام طیبہ کی فضاؤں میں ادیب”

اس کے زخم دل کا مرہم سرور کونین ہیں

_______________

ہے سجائی گی بزم عالم آگئے تاجدار دو عالم

05/03/202507/12/2024 by @Admin

ہے سجائی گی بزم عالم آگئے تاجدار دو عالم

پیکر نور خلق مجسم آگئے تاجدار دو عالم

دست قدرت کی تخلیق اول آئی دنیا میں ہو کر مشّکل

ہم موخر کہیں یا مقدم آگئے تاجدارِ دو عالم

ہے جبینِ ستم پر پسینہ اور شیاطیں کا ہے چاک سینہ

آرہی ہے یہ آواز پیہم آگئے تاجدار دو عالم

اٹھ نہ پائیگا اب جہل کا سر زندہ درگور ہوگی نہ دختر

اب نہ ترسے گی پھولوں کو شبنم آگئے تاجدار دو عالم

ارض مکہ ہے جنت بداماں گرم وادی بنی شب نمستاں

ہو گئی سرد نار جہنم آ گئے تاجدار دو عالم

بڑھ گئی فقر وفاقے کی عزت جاگ اٹھی غریبوں کی قسمت

صبح عشرت بنی ہر شب غم آگئے تاجدار دو عالم

اے ادیب اپنی نذر عقیدت لے کے جانا ہے پیش رسالت

غنچہ نعت کرلے منظم آگئے تاجدار دو عالم

_______________

اپنا تو آسرا فقط روز حساب ایک ہے

05/03/202507/12/2024 by @Admin

اپنا تو آسرا فقط روز حساب ایک ہے

کوئی سوال کیجئے سب کا جواب ایک ہے

والشمس والضحی وہی معنی ھل اتی وہی

کس نے کہا حضور کا میرے خطاب ایک ہے

کون ہے ایسا جو نہیں عشق رسول میں مگن

سیر ہے بزم میکدہ جام شراب ایک ہے

ان پہ درود اور سلام بھیجتے رہئے صبح و شام

منزل کا ئنات میں راہ ثواب ایک ہے

اپنا سا ان کو مان کے حکم سے ان کے انحراف

منکر عظمت نبی وجہ عتاب ایک ہے

وحدت ذات كبر یا ذکر جمال مصطفیٰ

باب کتاب ہیں بہت اصل کتاب ایک ہے

جن کو بنا کے انبیاء بھیجا خدا نے اے ادیب”

سب ہی ہیں محترم مگر عالی جناب ایک ہے

_______________

اپنا وہ اعجاز مجھ کو بھی دکھا دو مصطفیٰ

05/03/202507/12/2024 by @Admin

اپنا وہ اعجاز مجھ کو بھی دکھا دو مصطفیٰ

میں بھی پتھر ہوں مجھے کلمہ پڑھا دو مصطفیٰ

یہ تو میں کہتا نہیں تم مجھ کو کیا دو مصطفیٰ

ہاں مگر اتنا مجھے اپنا بتا دو مصطفیٰ

مردہ دل لوگوں کو جس نے بخش دی تازہ حیات

وہ حدیث زندگی کیا ہے سنادو مصطفیٰ

ہیں تمہارے ہاتھ میں سارے خزانے غیب کے

تم جو چاہو فیض کے دریا بہا دو مصطفیٰ

ہر طرف شور تلاطم ہر طرف موج بلا

میری کشتی کو کنارے پر لگا دو مصطفیٰ

ہو نہ جاؤں زندگانی کی کشاکش کا شکار

نا امیدی میں گھرا ہوں حوصلہ دو مصطفیٰ

اس پہ بھی ہو جائے شاید رحمت حق کا نزول

کنج دل کو وسعت غار حرا دومصطفی

سر بلندی ملتی ہے پتھر شکم پر باندھ کر

شان سے غربت میں جینے کی ادا دو مصطفیٰ

نور خضرا کی طرف ہے تک رہا کب سے ادیب”

شمع الفت اس کے سینے میں جگادو مصطفیٰ

_______________

نہیں ہے یوں تو کسی کا جواب ناممکن

05/03/202507/12/2024 by @Admin

نہیں ہے یوں تو کسی کا جواب ناممکن

مگر جواب رسالت مآب نا ممکن

اٹھائیں آپ جو انگشت پاک سوئے فلک

دو نیم ہونا دل ماہتاب ناممکن

حضور ہی تھے جو یہ منزلیں گزار گئے

وہ ذکر و فکر وہ عہد شباب ناممکن

یہ جان کر کہ رضائے نبی ہے مرضئ حق

نہ ابھرے ڈوبا ہوا آفتاب نا ممکن

کوئی بھی سرور عالم کا چاہنے والا

پھرے جہاں میں بحالِ خراب ناممکن

بہ یک نگاہ جو لائے تھے سرور عالم

اب آئے ایسا کوئی انقلاب نا ممکن

لئے ہے گوشۂ دامان مصطفیٰ سر پر”

ادیب اور غم روز حساب ناممکن

_______________

ہے اگر تو میری فغان شب تو نہ بیٹھ پردۂ راز میں

05/03/202507/12/2024 by @Admin

ہے اگر تو میری فغان شب تو نہ بیٹھ پردۂ راز میں

کبھی آ دیار حجاز میں کبھی جا دیار حجاز میں

ہے ہر ایک سمت سکوت شب ہے زباں پہ حمد و ثنائے رب

ذرا دیکھئے تو یہ کون ہے جو کھڑا ہوا ہے نماز میں

یہی ایک خوف سدا رہا جو میں آہ لب پہ نہ لا سکا

کہ نہ دیکھ لے کوئی جھانک کے تجھے میرے دل کے گداز میں

ہے گواہ عرصۂ لامکاں ہمیں بھولے شافع عاصیاں

نہ تو آکے خلوت ناز سے نہ تو جا کے خلوت ناز میں

ہوا دور دل سے ہر ایک غم جو بکھر گئی ہے بصد کرم

تو سمٹ کے آگئے دو جہاں اسی ایک زلف دراز میں

کبھی ضرب عشق اگر پڑی تو بشکل صورتِ اذاں اٹھی

یہ صدائے سوز بلال ہے جو نہاں ہے پردۂ ساز میں

نہ ہو کیوں مدینۂ مصطفیٰ مرے جذب شوق کی انتہا

کہ وہی حقیقت اصل ہے جو ہے اس جہانِ حجاز میں

نہیں کم ہے یہ بھی مجھے صلہ جو در رسول سے ہے ملا

کہ مری غلامی کی ہر ادا ہے نگاہ بندہ نواز میں

ہے ادیب ” قسمت نارسا مگر اے درشہ انبیاء

تو نہ جانے کب سے بسا ہوا ہے مری جبینِ نیاز میں

_______________

آئے وہ میرے سرکار سارے جگ کے تارن بار جن سے آس ہے مجھے

05/03/202507/12/2024 by @Admin

آئے وہ میرے سرکار سارے جگ کے تارن بار جن سے آس ہے مجھے

چاند ستارے کرتے نچھاور ہیں موتی کی لڑیاں

رہ رہ کے آکاش سے چھوٹیں نورانی پھلجھڑیاں

دور ہوئے ساری دنیا سے ظلمت کے آثار

آئے وہ میرے سرکار سارے جگ کے تارن بار جن سے آس ہے مجھے

دکھ ساگر کی برہم موجیں جب آنکھیں دکھلائیں

آ آ کے طیبہ سے ہوائیں کانوں میں کہہ جائی

ڈوبنے والوں مت گھبراؤ ہو گا بیڑا پار

آئے وہ میرے سر کار سارے جگ کے تارن ہار جن سے آس ہے مجھے

شرم سے سرمایہ داری کا سر نہیں اٹھ پائیگا

پیٹ پہ پتھر باندھ کے جینا عزت بن جائیگا

فخر کریں غربت کے مارے ناز کریں نادار

آئے وہ میرے سرکار سارے جگ کے تارن ہار جن سے آس ہے مجھے

ہر آنگن میں گونج اٹھے گی خوشیوں کی شہنائی

سارے انساں بن کے رہیں گے اک دن بھائی بھائی

گر کے رہے گی بھید بھاؤ کی یہ اونچی دیوار

آئے وہ میرے سرکار سارے جگ کے تارن ہار جن سے آس ہے مجھے

جن سے بڑھ کر کوئی نہیں ہے انسانوں کا محسن

جن کی ضرب الا اللہ سے گونج اٹھیں گے اک دن

مکے کے کوچے ہوں یا ہو طائف کا بازار

آئے وہ میرے سر کار سارے جگ کے تارن ہار جن سے آس ہے مجھے

جو اپنی میٹھی بولی سے کانوں میں رس گھولیں

وہ جن کے لیہائے مبارک راز کے دفتر کھولیں

ہاتھ کا تکیہ خاک کا بستر عالم کے سردار

آئے وہ میرے سر کار سارے جگ کے تارن ہار جن سے آس ہے مجھے

جن کی گود سے شیر خدا نے شانِ شجاعت پائی

جن سے عدل عمر نے اور عثماں نے سخاوت پائی

حضرت صدیق اکبر تھے جن کے یار غار

آئے وہ میرے سرکار سارے جگ کے تارن ہار جن سے آس ہے مجھے

_______________

اسی امید میں اپنی بسر اب زندگی ہوگی

05/03/202507/12/2024 by @Admin

اسی امید میں اپنی بسر اب زندگی ہوگی

کبھی تو وہ بلائیں گے کبھی تو حاضری ہوگی

مری آہیں صبا لیکر مدینے جب گئی ہوگی

تو شانِ رحمۃ للعالمینی جھوم اٹھی ہوگی

رخ و الشمس کی توصیف پوچھو خالق کل سے

کہوں گا میں تو توہین جمال یوسفی ہوگی

یقیں کب تھا یہ باطل کو اندھیرے مٹ ہی جائیں گے

عیاں فاران کی چوٹی سے ایسی روشنی ہوگی

انہیں آخر میں یوں بھیجا کہ تھا علم مشیت میں

یہ دنیا ایک دن محروم امن و آشتی ہوگی

سدا وحشت رہے پابند صحرا کیا ضروری ہے

جنوں اب ہو گا میرا اور مدینے کی گلی ہوگی

کھلیں گے عاصیوں پر بھی دریچے باغ رضواں کے

مشیت ناز بردار رسول ہاشمی ہوگی

جلو میں کاروانِ اہلِ الفت لیکے آئیں گے

قیامت میں عجب شانِ علامانِ نبی ہوگی

یہ کہکر نکلی قید جسم سے روح ادیب ” آخر

فضائے ارض طیبہ میرا رستہ دیکھتی ہوگی

_______________

کاش ہستی کا وہی آخری لمحہ ہوتا

05/03/202507/12/2024 by @Admin

کاش ہستی کا وہی آخری لمحہ ہوتا

سامنے آنکھوں کے جب گنبد خضری ہوتا

لوٹتی گردش ایام جو پیچھے کی طرف

کیا تعجب ہے کہ نظارۂ آقا ہوتا

دانت بے دیکھے اویس قرنی نے توڑے

جانے کیا ہوتا اگر آنکھوں سے دیکھا ہوتا

نور کے ساتھ کثافت کا تصور ہی غلط

نور آقا نہ اگر ہوتے تو سایہ ہوتا

آپ کا حکم اگر ہوتا تو کنکریاں کیا

لب انگشتِ ابو جہل پہ کلمہ ہوتا

میرے آقا نے تری بات بنادی ورنہ

آج دنیا ترا بگڑا ہوا نقشہ ہوتا

ہم اگر مانتے آقا کے اصولِ زرّیں

اپنی تاریخ کا ہر باب سنہرا ہوتا

اب مسیحائی کو آتی نہیں طیبہ سے نسیم

اس سے اچھا تھا کہ بیمار نہ اچھا ہوتا

ان کا مداح جلے نار جہنم میں ادیب

کیسے یہ شافع محشر کو گوارا ہوتا

_______________

Home

Bookmark

Menu

Videos

Join

مقصد جز و کل مرضئ کبریا آپ کی ذات ہے یا حبیب خدا

فخر نوح و فخر آدم سرور کونین ہیں

ہے سجائی گی بزم عالم آگئے تاجدار دو عالم

اپنا تو آسرا فقط روز حساب ایک ہے

اپنا وہ اعجاز مجھ کو بھی دکھا دو مصطفیٰ

نہیں ہے یوں تو کسی کا جواب ناممکن

ہے اگر تو میری فغان شب تو نہ بیٹھ پردۂ راز میں

آئے وہ میرے سرکار سارے جگ کے تارن بار جن سے آس ہے مجھے

اسی امید میں اپنی بسر اب زندگی ہوگی

کاش ہستی کا وہی آخری لمحہ ہوتا

Links

Quick Links

Top Categories