Manqabat Archives - Page 8 of 10

نبی کے دلارے مدار دو عالم

05/03/202510/12/2024 by @Admin

نبی کے دلارے مدار دو عالم

ہیں زہرہ کے پیارے مدار دو عالم

کسی کا کوئی ہے کسی کا کوئی ہے

ہمارے ہمارے مدار دو عالم

غریب و تو نگر تمہارے ہی در پر

ہیں دامن پسارے مدار دو عالم

رہیں گے وہی سرخرو دو جہاں میں

ہیں جو بھی تمہارے مدار دو عالم

تمہارے کرم سے ضیاء بار ہم ہیں

یہ چاند اور تارے مدار دو عالم

ہماری نظر میں وہ جنت ہے محضر

جہاں ہیں ہمارے مدار دو عالم

——

بحر غم ہو چلا بے کراں

05/03/202510/12/2024 by @Admin

بحر غم ہو چلا بے کراں

المدد اے مدار جہاں

حال دل اپنا کرنے بیاں

در پہ آیا ہے اک بے زباں

ہے سپرد آپکے آشیاں

لاکھ چمکا کریں بجلیاں

آپ کا کوئی ثانی کہاں

آپ تو ہیں مدار جہاں

مل گیا حاصل جستجو

سامنے ہے ترا آستاں

کیا کریں گے مرا حادثے

آپ جب مجھ پہ ہیں مہرباں

پھیلی ایمان کی روشنی

ہند میں آئے قطب جہاں

ہم ہیں آقا غلام آپ کے

جائیں در چھوڑ کر پھر کہاں

شمع دل کے نگہباں ہو تم

لاکھ اٹھتی رہیں آندھیاں

سمت محضر بھی چشم کرم

اے انیس دل ناتواں

——

جس کا ہر سمت اجالا ہے مدار عالم

05/03/202510/12/2024 by @Admin

جس کا ہر سمت اجالا ہے مدار عالم

وہ فقط آپ کا جلوہ ہے مدار عالم

مرتبے میں وہ زمیں خلد سے بھی بہتر ہے

جس جگہ آپ کا روضہ ہے مدار عالم

آپ فرمائیں نہ کیسے انا شمس الافلاک

آپ کی شان ہی اعلیٰ ہے مدار عالم

عرض غم آپ سمجھتے ہیں یہ ہے اور ہی بات

ہم کو کیا اتنا سلیقہ ہے مدار عالم

تاج پہنا کے ولایت کا رسول کل نے

ہند میں آپ کو بھیجا ہے مدار عالم

مل گیا میرے سفینے کو کنارا محضر

جب زباں پہ میری آیا ہے مدار عالم

——

وہ جس نے روئے مدار جہاں کو دیکھ لیا

05/03/202510/12/2024 by @Admin

وہ جس نے روئے مدار جہاں کو دیکھ لیا

جمال سرورکون ومکاں کو دیکھ لیا

نہ کوئی متقی پایا حضور کے جیسا

زمیں کو دیکھ لیا آسمان کو دیکھ لیا

میں مطمئن ہوں فقط آپ کی نوازش پر

ہے بجلیوں نے مرے آشیاں کو دیکھ لیا

ترے جوار کے ہر ذرۂ درخشاں پر

نثار ہوتے مہ و کہکشاں کو دیکھ لیا

وہیں پہ سجدے کئے ہیں جُنوں کے ماروں نے

جہاں تمہارے قدم کے نشاں کو دیکھ لیا

علاوہ آپ کے سرکار ہم غریبوں کا

نہیں ہے کوئی بھی سارے جہاں کو دیکھ لیا

تڑپ اٹھی جو نظر روضۂ نبی کے لئے

تو میں نے روضۂ قطب جہاں کو دیکھ لیا

پکارا دل نے مدار جہاں کو اے محضر

جو طیبہ جاتے کسی کارواں کو دیکھ لیا

——

جھکتی یہاں پہ ہر نگہ ہوشیار ہے

05/03/202510/12/2024 by @Admin

جھکتی یہاں پہ ہر نگہ ہوشیار ہے

اے دل یہ آستانۂ قطب المدار ہے

یہ جان کر کہ آپ ہیں سنتے غریب کی

میرے لبوں پہ آگئی دل کی پکار ہے

آقا کی بارگاہ میں دیوانے آئے ہیں

کوئی گریباں چاک کوئی دل فگار ہے

در سے نہ خالی لوٹ کے جائے گا یہ غلام

آقا ترے کرم پہ اسے اعتبار ہے

کب دیکھئے اٹھاتے ہیں قطب جہاں نقاب

میری نگاہ شوق کو یہ انتظار ہے

روضہ کی سمت نظریں اٹھاؤ تو زائرو

دیکھو برستی رحمت پروردگار ہے

ہم کو ستا نہ پائیں گے دنیا کے حادثات

سر پر ہمارے دامن قطب المدار ہے

اس کی طرف بھی نظر عنایت اٹھے حضور

محضر بھی اک نظر کے لئے بے قرار ہے

——

یہ وصف میرے لئے کب کسی دیار میں ہے

05/03/202510/12/2024 by @Admin

یہ وصف میرے لئے کب کسی دیار میں ہے

سکوں جو دل کو میسر ترے جوار میں ہے

جسے بھی چاہیں ولایت سے مالہ مال کریں

یہ بات قطب دو عالم کے اختیار میں ہے

لبوں پہ آتے ہی ہوتی ہیں مشکلیں آساں

نہ جانے کتنا اثر لفظ دم مدار میں ہے

ہم اپنے تاب تصور پہ ناز کرتے ہیں

کہیں بھی ہم ہیں مگر دل کوئے مدار میں ہے

جگر کے زخموں پہ مرہم کا کام کرتا ہے

اثر وہ ارضِ مکنپور کے غبار میں ہے

بسی ہے روضۂ اقدس میں نکہت طیبہ

نہاں نبی کی امانت اسی مزار میں ہے

شرف زمانے میں پایا ہے ان کی نسبت سے

نہیں تو ہستئی محضر بھی کس شمار میں ہے

——

ہے ہماری زندگی ذکر مدار العالمیں

05/03/202510/12/2024 by @Admin

ہے ہماری زندگی ذکر مدار العالمیں

ہم نہ چھوڑیں گے کبھی ذکر مدار العالمیں

اپنے قلب مضطرب کو مل گیا صبر و قرار

آیا جو لب پر کبھی ذکر مدار العالمیں

اس گھڑی گوش سماعت کو ادب سکھلائیے

کر رہا ہو جب کوئی ذکر مدار العالمیں

تذرکرہ غیروں کا وجہ سورش و ہنگامہ ہے

روح امن و آشتی ذکر مدار العالمیں

کیوں حراساں ہو رہا ہے ظلمتوں سے میرے دل

تجھ کو دے گا روشنی ذکر مدار العالمیں

روکنا جو چاہتے ہیں وہ مخالف دیکھ لیں

ہو رہا ہے اور بھی ذکر مدار العالمیں

کاش ہو محضر یہی بس زندگی کا مشغلہ

ذکر حق ذکر نبی ذکر مدار العالمیں

——

جلوہ فگن جو دیکھا جمال نبی یہاں

05/03/202510/12/2024 by @Admin

جلوہ فگن جو دیکھا جمال نبی یہاں

شب بھر طواف کرتی رہی چاندنی یہاں

جائے غلام ان کا کسی آستاں پہ کیوں

نعمات معرفت کی بھلا کیا کمی یہاں

ہر اک مرے کو مار کے زندہ مدار نے

دی ہے کرم سے اپنے نئی زندگی یہاں

شاہان باوقار ہوں یا کوئی خاکسار

ہیں دامن طلب لئے آئے سبھی یہاں

زندہ ولی ہیں وارث میخانہ رسول

آؤ بجھائی جاتی ہے تشنہ لبی یہاں

ہر سمت نور بار ہیں جلوے حیات کے

زندہ نبی وہاں ہیں تو زندہ ولی یہاں

جس کو کہیں سکون کی نعمت نہیں ملی

محضر اسے غموں سے اماں مل گئی یہاں

——

ہے طلب جن کو ترے در کی طرف آئیں گے

05/03/202510/12/2024 by @Admin

ہے طلب جن کو ترے در کی طرف آئیں گے

ہیں جو پیاسے وہ سمندر کی طرف آئیں گے

قطب واغواث بھی تحصیل سعادت کے لئے

آج اس روضہ انور کی طرف آئیں گے

جالیوں کی تو کشش اپنی جگہ پر یوں بھی

ہم تو دیوانے ہیں پتھر کی طرف آئیں گے

ان کے پیارو سے عداوت ہے تو روز محشر

لوگ کس منہ سے پیمبر کی طرف آئیں گے

میں دہائی تری دے دوں گا مدار عالم

حادثہ اب جو مرے گھر کی طرف آئیں گے

نام لے گا ترا محشر میں بھی انشاء اللہ

جب فرشتے ترے محضر کی طرف آئیں گے

——

کعبہ نظر آتا ہے طیبہ نظر آتا ہے

05/03/202510/12/2024 by @Admin

کعبہ نظر آتا ہے طیبہ نظر آتا ہے

سر کار کی جالی سے کیا کیا نظر آتا ہے

نسبت اسے حاصل ہے کوثر کی روانی سے

اے زائرو جو تم کو دریا نظر آتا ہے

ہر اہل بصیرت کو سرکار کی صورت میں

اللہ کی قدرت کا جلوہ نظر آتا ہے

دیکھے تو کوئی عالم رتبے کی بلندی کا

بندہ بھی یہاں آکر آقا نظر آتا ہے

وہ روضہ اقدس ہے جس ارضِ مقدس پر

ہم کو وہ مدینے کا ٹکڑا نظر آتا ہے

انوار سیادت بھی تجھ کو نہ نظر آئے

منکر تیری آنکھوں پر پردہ نظر آتا ہے

ہے قطب دو عالم کی نسبت کا اثر محضر

جو تیرے مناقب کا چرچہ نظر آتا ہے

——

Home

Bookmark

Menu

Videos

Join

نبی کے دلارے مدار دو عالم

بحر غم ہو چلا بے کراں

جس کا ہر سمت اجالا ہے مدار عالم

وہ جس نے روئے مدار جہاں کو دیکھ لیا

جھکتی یہاں پہ ہر نگہ ہوشیار ہے

یہ وصف میرے لئے کب کسی دیار میں ہے

ہے ہماری زندگی ذکر مدار العالمیں

جلوہ فگن جو دیکھا جمال نبی یہاں

ہے طلب جن کو ترے در کی طرف آئیں گے

کعبہ نظر آتا ہے طیبہ نظر آتا ہے

Links

Quick Links

Top Categories