کون ہے تجھ سا جو اے آمنہ والے سورج
اپنی انگلی کے اشارے سے اگالے سورج
کتنے تاباں ہیں در پاک نبی کے ذرے
سر جھکا کر انہیں آنکھوں سے لگالے سورج
ہے ضیاء بار جمال رخ زیبائے رسول
ماند پڑ جائیں نہ کیوں تیرے اجالے سورج
ڈال کے طوق غلامیئ نبی گردن میں
چاند مٹھی میں تو دامن میں چھپا لے سورج
چوم کر صاحب معراج کے نوری تلوے
اپنی سوئی ہوئی تقدیر جگا لے سورج
دیکھ خار رہ طیبہ کی ضیاء پاشی دیکھ
کتنے روشن ہیں میرے پاؤں کے چھالے سورج
تیرے آقا نے بٹھایا تھا انہیں کاندھوں پر
بے سہاروں کو تو آنکھوں پہ بٹھا لے سورج
دیکھے جب سورۂ والنور کے روشن آیات
کیوں نہ پھر دانتوں تلے انگلی تو دبالے سورج
جو تنے تھے مرے آقا کی حفاظت کے لئے
تو نے تو دیکھے ہیں مکڑی کے وہ جالے سورج
چوم کر نقش کف پائے رسالت ” مصباح “
اپنی تقدیر کے ذروں کو بنالے سورج
