جو منشاۓ مشیت تھا محمد کے نواسے نے
کیا کربل میں وہ پورا محمد کے نواسے نے
دوعالم میں کیا شہرہ محمد کے نواسے نے
بجا کے دین کا ڈنکا محمد کے نواسے نے
بچانے دین احمد کیلئے کربل کی دھرتی پر
لٹایا گھر کا گھر سارا محمد کے نواسے نے
کیا قربان گھر کا گھر خداکی راہ میں لیکن
نہیں گرنے دیا جھنڈا محمد کے نواسے نے
میں گو کہنے کو تھا پتھر نگاہیں ڈال کر اپنی
بنا ڈالا مجھے ہیرا محمد کے نواسے نے
یزیدی بھیڑیوں میں ہو گیا ہیجان تھا برپا
لگایا جس گھڑی نعرہ ۔محمد کے نواسے نے
قیامت تک کوئی تمثیل اسکی دے نہیں سکتا
کیا کربل میں جو سجدہ محمد کے نواسے نے
جناب حضرت حر فوج باطل سے نکل آئے
دکھایا جب روۓ زیبا محمد کے نواسے نے
سلاطین زمانہ انکے در پہ سر جھکاتے ہیں
بنایا جس کو ہے اپنا محمد کے نواسے نے
کوئی ہو دوسرا انکی طرح تو لاؤ دکھلاؤ
تھآ پہنا خلد کا جوڑا محمد کے نواسے نے
زمانہ فیض پاتا ہی رہے گا تا ابد اس سے
بہایا ایسا اک دریا محمد کے نواسے نے
نہیں دور خزاں کا اس چمن کو کوئی ہے خطرہ
لہو سے جس کو ہے سینچا محمد کے نواسے نے
شرافت میرا ایماں ہے ہر اک فوج یزیدی کو
دکھایا خلد۔ کا نقشہ محمد کے نواسے نے
از نتیجہء فکر
شرافت مداری
Jo mansha-e-mashiyat tha Muhammad ke nawaase ne
Kiya Karbal mein woh poora Muhammad ke nawaase ne
Do-aalam mein kiya shehra Muhammad ke nawaase ne
Baja ke deen ka danka Muhammad ke nawaase ne
Bachaane deen-e-Ahmad ke liye Karbal ki dharti par
Lutaaya ghar ka ghar saara Muhammad ke nawaase ne
Kiya qurbaan ghar ka ghar Khuda ki raah mein lekin
Nahin girne diya jhanda Muhammad ke nawaase ne
Main go kehne ko tha patthar nigaahen daal kar apni
Bana daala mujhe heera Muhammad ke nawaase ne
Yazeedi bheriyon mein ho gaya hejaan tha barpa
Lagaaya jis ghari naara Muhammad ke nawaase ne
Qayamat tak koi tamseel is ki de nahin sakta
Kiya Karbal mein jo sajda Muhammad ke nawaase ne
Janab-e-Hazrat-e-Hurr fauj-e-baatil se nikal aaye
Dikhaaya jab ro-e-zeba Muhammad ke nawaase ne
Salaateen-e-zamaana un ke dar par sar jhukaate hain
Banaaya jis ko hai apna Muhammad ke nawaase ne
Koi ho doosra un ki tarah to laao dikhlaao
Tha pehna khuld ka jora Muhammad ke nawaase ne
Zamaana faiz paata hi rahega taa abad is se
Bahaaya aisa ek darya Muhammad ke nawaase ne
Nahin door khizaan ka is chaman ko koi hai khatra
Lahoo se jis ko hai seencha Muhammad ke nawaase ne
Sharafat mera imaan hai har ek fauj-e-Yazeedi ko
Dikhaaya khuld ka naqsha Muhammad ke nawaase ne
Az nateejah-e-fikr
Sharafat Madaari
