ذرہ ذرہ تیرا درج بے بہا ہے کربلا
دفن تجھ میں کائناتِ فاطمہ ہے کربلا
منزل کو نین جس کے زیر پا ہے کربلا
تیری دھرتی پر رکا وہ قافلہ ہے کربلا
جس کو سن کر خون کی آنسو شفق رونے لگا
درد میں ڈوبا ہوا وہ واقعہ ہے کربلا
آتا ہے زینب کی جب زلف پریشاں کا خیال
خون روتی اب بھی ساون کی گھٹا ہے کربلا
حضرت عباس کا کردار یہ بتلا گیا
کس کو کہتے ہیں اخوت بھائی کیا ہے کربلا
پردۂ مغرب میں سورج چھپ گیا تھا شرم سے
زینب مضطر ہوئی جب بے ردا ہے کربلا
کیا کہا تھا تشنہ لب شبیر نے کچھ تو بتا
تو نے تو وہ آخری خطبہ سنا ہے کربلا
تھام لے عابد کو بڑھ کر کیونکہ یہ بعد حسین
بیکس و بے یار ہے بے آسرا ہے کربلا
دھڑکنوں کو بھی ادب سکھلا کہ ہے جائے ادب
ہوش میں آ سامنے اب کربلا ہے کربلا
تیرے ذروں پر کرے جا کر یہ سجدہ ریزیاں
اب یہی ” مصباح ” کے دل کی دعا ہے کربلا
